بسم الله الرحمن الرحيم



هذا اول مره ا كتب قصة حياتي كلها وسبب استقامتي هي طويله لاكن ممتعه وفيها مواقف حلوه اتمنى الكل يقراها ..

الحمد لله تربيت في اسره محافظه ولله الحمد وحياه بسيطه مافيها فقر ولا فيها غنا ولله الحمد عيشه بسيطه وتربيت على مخافة الله ولله الحمد كانت تتوفر ما اطلبه من الاجهزه ومن الالعاب ولكن بحدود.....

وبالنسبه للحي الي انا فيه الصراحه عشت في حي مختلط من كل مكان ويوجد فيه الصالح والطالح عشت في هذا المجتمع حياه بريئه وكنت احب الكره وبدئت اجمع لي ربع مثل مايقولون واصدقاء ونلعب ونمرح وكان هذا هو هدفنا كلنا (ربعي) في الحياه مع العلم كان قلبي ولله الحمد معلق بالمسجد وكانت هذه تربيتي وفي وقت الصلاه واروح اصلي في المسجد .....

كنت وانا صغير لا تتقبل فطرتي وتربيتي على الالفاظ القبيحه ولي موقف اذكره لكم طريف ( تهاوشت مع شخص وتلفظ علي الفاظ قبيحه ومن قوه القهر رديت عليه بالفاظ قبيحه بالنسبه لي وانا صغير قلت له يابقيره (بقيره الي معا موكلي ) >> فلم كرتون القديم ....

وصلت للمرحله المتوسطه وكان لي صديق عزيز عزيز واقولها بكل فخر كنت احبه حب بريئ لم يدخل فيه الخبث والعياذ بالله وكانت حياء بريئه كان ينام عندي وانام عنده واكل عنده في بيتهم وياكل عندي وكل شي حتى في الملابس احيانا كنا نلبس ثياب بعض وهو مع الوقت ومع الظروف الصعبه لم يتغير معي وكانت حياه جميله وممتعه والحمد لله الى الان لاكن كل منا له ض\ظروفه الخاصه طبعا نلتقي بين فترة وفترة

اما بالنسبه للدراسه. بديت بالدراسه المتوسطه بس بالعربجه يعني عربجي لني خلاص بديت احس اني صرت كبير وانا الحين رجال وبدت ا كون لي ربع بس الحمد لله مسالمين كلهم ولا يحبون المشاكل كنت انا الي افلها معهم كانت مايحلى الفصل الى فيني لني راعي فرفشه وضحك مع المدرسين لدرجه المدرس العصبي والشديد ماخليه يطلع الا وهو يضحك ولا اخليه يطلع وهو معصب علي لازم اعتذر منه قدام الفصل كله واخليه يضحك هذا كان اسلوبي في هذا المرحله 000000 يوووه ياحلات ذيك الايام احسن مرحله مريت فيها في حياتي الدراسه كنت اذا استلمت واحد ياويله يتحسف انه تحرش فيني كانت الكلمه اردها بعشر بس بعشر كلمات مضحكه طبعا بس مع كل هذه ماكنت استخدم الكلام القبيح ولله الحمد

المهم بدت معالم الرجوله ومعالم الصياعه ومن المعلوم ان هذه المرحله صعبه وهذه المرحله مرحله المراهقه وكل شي في راسه بيسويه مع هذا كله كنت الحمد لله احاول ابعد قدر ما استطيع عن اي شي حرام االحمد لله وهذه شي اعتز فيه وسأذكرها.....

كانت في هذه المدرسه ناس جهله ما يعرفون معنا التربيه ولا يعرفون معنا الدين..... تم عرض لي اكثر من مره ان افعل الفاحشه والعياذ بالله .. لاكن ولله الحمد كانت فطرتي سليمه وتربيتي سليمه والحمد لله هذا فخر لي انني ماعمري فعلت الفاحشه سوا (اللواط او الزنا ) والحمد لله ....... اسل الله اني يثبتني على ذالك .... ..


كونت لي صديقا.... صداقه بريئه مثل مايقولون ثم بعد سنتين من الصداقه او ثلاث سنوات افترقنا وبدئت العلاقه تخف وفي هذه الفتره بدات تجيني المصايب من كل جهه والحمد لله ومن نتيجه هذه المصايب سببت لي مثل التوتر والقللق والاكتئاب ووووو الخ..

وبدئت معاناتي في المرحله المتوسطه في الصف الثالث بدائت معانتي وبديت افتح على الحياه وبديت افهم الي صاير حولي يعني كل الي قلته لكم كانت فتره بريئه وحياة بريئه جدا واجزم لكم ان ماحد كان بريئ مثلي ...> وهذه مبالغه طبعا من واقعي........

وبديت افهم الحياه وخشيت المرحله الثانويه وبدت الضروف تكثر علي من جميع الاتجاهات وبدت المشاكل وبدت المصائب وكانت في هذه الفتره ماعندي ربع معينين

كنت اطلع مع هذا واروح مع هذه وماثبت على حد معين وبعد فتره وفي فتره الثنوي المرحله الاوله حصلت لي ضروف صعبه جدا جدا وهي سبب في الالتزاام ولله الحمد و في فتره الظروف كانت هي اختباراتي في الفصل الدراسي الاول ورسبت في كل موادي ومع العلم هذا الصدمه الاوله في حياتي لني ماعمري رسبت بس الظروف يا اخوان صدقوني تخلي الواحد خروف المهم عموم الحمد لله على كل حال الان على كل المصايب الي متحملها جات مصيبه الرسوب وبعدها تحطمت وبدت الحالة النفسيه تسيئ جدا وقررت ان اطلع من الدراسه وبالفعل طلعت

وبدت حياتي مع الضيق والضنك مع العلم ( انا من الفتره المتوسطه بديت اسمع الاغاني ) وزادت الضنك عندي وبديت احس بضيق شديد وكنت احاول ان ارفه عن نفسي بسماع الاغاني وكان الكمبيوتر عندي كله اغاني والله يا اخوان كان كله اغاني وفي مجلد واحد اناشيد وكل مره اطالع فيه واقول مادري امسحه ولا اخليه بس اتراجع اقول يمكن احتاجه يوم من الايام وخليته ودارت الايام ودارت وشريت لي جميع الاجهزه الي اقدر انسي نفسي والهي نفسي وابعد عني الي جاني كله (الظروف ) ومافي جهاز ماشريته وكنت اخش الشات والله يا اخوان 10 ساعات متواصله يعني ادمان غير طبيعي ومع كل هذا الضيق موجود

والطفش موجود وبديت اخش الشات الصوتي قلت يمكن استانس ومن سؤ حظي بديت اغني لهم وهم يشجعوني والي قول لي شارك في سوبر ستار والي قول لي لك مستقبل عاد انا في هذه الحال بديت احظر اغاني واكتبهم واحاول احفضهم يا سبحان الله في الباطل نجتهد لاكن في الخير نسوف المهم بديت اكتب واجمع لين خلاص اشتهرت باني اغني في بعض الشاتات الصوتيه ومع هذا كله كنت الله اعرف ان هذا كله حرام وغلط ومايجوز ومايصلح وكنت اسمع محاظرات لاكن اقول ماقدر اتوب صعبه اني اتوب واقول طيب والشباب الي مسجلين علي صوتي والي والي بس اقول ان شااء الله اتوب بس بدون صدق طبعا كنت اقولها وانا خايف ان ضج اتوب هههههههه والله شي مضحك يا اخوان كنت خايف اتوب واترك هذا الوناسه الي هي الضنك صار عندي وناسه سبحان الله غريب حالي كنت اقول شلون اتوب واروح مع المطاوعه وهم ماعندهم وناسه ولا شي ومافي طلعات ولا وناسه كنت اضحك على نفسي


والله يا اخوان مع كل هذا الي عنديى والي اقدر اسوويه والي سويته الراحه ماعرفها دايم ضنك دايم ضيق المهم بعدها شريت جهاز يسمونه كنود بخربها (مخربها اليوم انا لكم شريت كنود قلت يمكن استانس وبرضو بديت اغني لهم وهم مستانسين مني المهم بعد ايام سبحان الله سمعت شريط نسيت شنو هذا الشريط ولمنو بس مادري احس ان ضرب سهم في قلبي قليل وبديت احاول افهم سبب الضيق بديت ومع العلم الا الان انا كنت اصلي يعني مع هذا الاغاني والبلاوي الي ماقدر اذكرها كنت اصلي وبعدها قررت انني اسمع اغاني بس بدون مسيقى ياسلااام قرار حلو كنت بجد بديت اذا سمعت اغنيه بمسيقى كنت اتضايق بزياده واذا طفيته ارتاح قلت مالي الى اسمع بدون مسيقى وبالفعل غامرت وقلت لله مع اني سامعها من شيخ الله يغفر له اضن ان للجبيلان والحمود الي يقول فيه طفشااااااان نن زهقاااااانننن طفرااااااااانننن ههههه سبحان الله حسيت انه يتكلم عني واذكر قال اترك المعاصي لله قلت بجرب خلني احذفهم لله والله واسوي للاغاني كلهم دليت وحذفتهم وبديت اجمع اغاني بدون موسيقى وبعد فترى حسيت اتضايق نفس الشي وقلت ليه ما اسمع قصايد احسن لي سبحان الله ماجا في بالي ان اسمع قران او نشيد مع العلم اسمع محاظرات من شهر لي شهر . وفعلا حذفت الاغاني وبديت اسمع قصايد غزليه وفيها مسيقا ونفس الشي بديت اتضايق يا اخوان ....

والان بدت رحله الهدايه يوم بديت اغني بصوتي لاحد الاصدقااء يا سبحان الله حسيت بضيق غير طبيعي حسيت بضيق ومن شده الضيق صار في عيوني غشاوه ومن بعدها قررت ان لا اغني واقسم بالله لن اغني نعم قررت اني ما اغني والله يا اخوان رحت للصاله وكانو اهلي متواجدين لني قلت خلاص هذا الموت قمت اشوف اهلي وهم يقولون لي شفيك قلت مافيني شي وتركتهم والله يا اخوان اني اتجهت الى دوره المياه اجلكم الله وبديت اتوضاء والضيق في صدري بعدها حسيت ببروده والله يا اخوان ببروده في صدري حسيت ببروده ......

بعدها يااخوان رحت اصلي ركعتين وناجيت ربي فيها وسلت ربي ان يهديني بصدق وسلت ربي ان يفتح على قلبي وعاهدت ربي اني مراح اغني ومراح افعل معاصي وبعد الصلاه فتحت المصحف وبديت اقرا سوره البقره والله والله يا اخوان بديت ارتاح دتريجيا وبديت احس براحه الين قلبي المقفول والمضنوك انفتح والله يا اخوان بديت ابكي بكاء بكاء لاكن الحمد لله......لم تنتهي قصتي يا اخوان الان الشيطان رجع لي مره ثانيه وقال لي طيب ارجع حط الاغاني الي بدون مسيقى ولا تسمعهم بس اسمعهم مره معليه اسمعهم ورح توب سحان الله تذكرت كلمه من شريط لشيخ ان ربما ان اموت على حرام وقلت مراحارجعها خلاص عاهدت ربي ...


وفي هذه الفترا عندي ابن خاله لي وفي نفس الوقت زوج اختي كان انسان ضايع لايعرف في الدين الى الصلاه فقط.....جاني خبر انه استقام ماصدقت هذا يستقيم لا لو شنو مايستقيم هذا هذا راعي كذا وكذا يستقيم وقالو لي والله استقام وبعد فترى جا البيت عندنا ووجه منور وبدت على وجه شعيرات صغار تدل على انه اطلق اللحيه واناظرت تحت واشوف الثوب فوق الكعب قلت هذا انت
قال لي ايه انا منت مصدق قلت سبحان الله......... قلت شسالفه قال تعال معي وبدا يقول لي سالفته وانا منزل راسي وابكي وهو جالس يقول لي قصه حياته وشلون يوم سلك طريق الاستقامه ارتاح وشنو الي الله عوضه يوم ترك كل شي لله وانا بديت ابكي وتركته ولا يدري شفيني يفكر ان كلامه ماعجبني انا رجت الغرفه وبكيت ورحت لاختي قلت لها اسلك بالله هل ماجد ارتاح يوم استقام قالت والله العلي العظيم ان حاله الان غير اول الان دايم مرتاح نفسيا اقسم بالله يا اخوه اني بكيت واول مره اهلي واخواني يشوفوني كيذا ابكي .


بعدها قررت قرار انني سوف اسلك هذا الطريق ولن اتراجع وفعلان سلكته وبدا ماجد يعينني ويعطيني االاشرطه (للشيخ خالد الراشد ) ااااااه بدايت الااستقامه حلوه.

عموما بديت احس بالنور والراحه والسكينه والطمئنينه والخشوع والخشيه والله انني وجدت الشي الي كنت ادور عليه اقسم بالله وجدته في طريق الالتزام يا سبحان الله كنت اقول لامي يمه انا ماني على الارض انا فوق فوق احس بحساس غريب بسعاده غريبه يالله هذه الي كنت ادور عليه والحمد لله بعد فتره قلت بغامر وبقصر ثيابي وغامرت وياحلات هذه المغامره والله زاد راحتي وزاد ايماني وبعد فترى قلت خلاص ابي اصير مطووووووووووع بخربها وبخلي اللحيه والحمد لله خليتها وبعدها تعرفت على مطاوعه او بمعنا ثاني شباب اسلاميين او بمعنا شباب الخير وبديت اشوف الي كنت اضنه فيهم انه غلط لقيت فيهم ان هم الي مرتاحين وهم راعين الطلعات والوناسه وهذه كل قصتي واسل الله لي ولكم الثبات والله يا اخوان ادري اني طولت عليكم بس هذه قصه حياتي كلها مع العلم انها مختصره وادري اني فصلت كثير بس معليش انا جالس اتكلم من قلب صادق واسل الله ان يثبتني على دينه واسلكم بالله ان تدعوني لي بظهر الغيب ومابيها كتابه ابيها بظهر الغيب بالثبات وبسعاده تكفون


واسمحو لي مره ثانيه على الاطاله
وهذه ربما يقرئها احد الشباب او الاخوات الي مترددين بالخطوه او الي يدورون عن الراحه او الي بدا يحن قلبه للالتزام صدقوني اقولها لكم جربوها ومراح تخسرون غامرو لله صدقوني مغامره ولا احلى



تقبلو تحيات اخوكم في الله (محمد)
عسل

قصتي

التعليقات
الصفحة 1 من 1 صفحة